Teri rahmat athhaah!..............

Teri rahmat athhaah! Ya Allah
Main ghariq e gunaah Ya Allah

Dur beeni ke par bahut chhote
Saazishen, be panaah Ya Allah

Kitni aabaad hain kamin gaahen
Lut gayi khanqaah!! Ya Allah

Kiya kare ab tera sipah saalaaar
Dar gayi hai sipaah!! Ya Allah

Zindagi kitni jabr hai, phir bhi
Kyon hai jine ki chaah Ya Allah

Aansuon ki pukaar ab sun le!!
Khol bakhshish ki raah Ya Allah