Raat ke Khaab sunaayeN kis ko..............

Raat ke Khaab sunaayeN kis ko raat ke Khaab suhaane thay

DhuNdhle dhuNdhle chehre thay par sab jaane pahchaane thay

Ziddii vahshii alhaR chanchal miiThe log rasiile log
HoNT un ke GhazaloN ke misr’e aaNkhoN meN afsaane thay

Ye laRkii to in galiyoN meN roz hii ghuumaa kartii thii
Is se un ko milnaa thaa to is ke laakh bahaane thay

Ham ko saarii raat jagaayaa jalte bujhte taaroN ne
Ham kyuuN un ke dar pe utre kitne aur Thikaane thay

Vahshat kii unvaan hamaarii in meN se jo naar banii
DekheNge to log kaheNge ‘Insha’ ji diiivaane thay